|
«Менам чужсьылöма кык дöрöмӧн»
Чужлiс Игнатий Агеевич Вöльдiнын 1926 вося сентябр 19 лунö. Батьыс, Агей Иванович, волöма сиктас кыськö Крутöйланьысь. Мамыс, Александра Родионовна, сiдз жö локтöм морт. Гозъя чужтісны сизим ныла-пиаöс. Быдмисны витыс. Талун сöмын Игнатий да сылöн Таисия чойыс ловъяöсь. Сьöкыд овны уна челядьнад. Но Уляшевъяслöн семья кач абу сёйлöма, кыдзкö лёк кадас бергöдчöма. Война вылö мунтöдз Игнатий помалiс 9 класс. Удитiс уджавны и разнорабочöйöн, и трактористъяслӧн бригадирöн, и заправитчысьӧн. 1943 вося октябрын сылы воис повестка. Тасянь и заводитчис том зонлöн фронтöвöй туй. — Квайт мортöс сэк босьтiсны Вöльдiнысь, — казьтылö Игнатий Агеевич. – Мунiм Прокö Ёгор, Миколай Ёгор, Иван Ёгор, Вась Öлексей, Семен Миш да ме. Аттьö колхозлы, вöлöн отсалiс, одноколкаöн. Сы вылын нопъяс нуим. А асьным подöн сорöн Кулöмдiнад воöдчим. Кык лун сэнi олiм. Видлаліс комиссия. Ме эг чайт, мый босьтасны армияӧ: тушаöй вöлi вывтi ичöт. Метр да 48 сантиметр. Но чукöртiсны ставнымöс культура керка дорö, лыддисны список и менö тшöтш сэн шуисны. Связистöн пö лоан. Мöдöдчим Сыктывкарлань. Пожöгысь Öвер Педьöкöд век öтлаын мунiм, öти доддьын нопъяс куйлiсны. Карсянь водзö мöдöдчим бара жö подöн. Кöть нопъяс улö машина сетiсны. Мен мойвиис Часовоöдз машинаöн мунны. Тöдса морт, Александра Ильинична Черепанова, пуксьöдiс машинаас. Коркö воим Княжпогостöдз, и пуксим эшелонö. Скöт новлан вагонъясö. Жаль, но ме танi торъялi Öвер Педьöкöд. Вагонын – «веськыд сювъя» пач, тöлыс шутьлялö. Сувтсöн сорöн и мунiм Архангельскöдз. Сэн пывсим-мыссим, шырсим, вежcим. Cтавным öткодьöсь лоим. Веськалi 33-öд запаснöй стрелкöвöй полкö. Орчча койкаын мекöд тöлысь кымын узьлiс Мöдлапöв грездысь Вась Öлексей. Коркö примитiм присяга. Салдатъясöн лоим. Олан условиеяс абу бурöсь, вердiсны лёка. Ме сiдз нин челядь кодь вöлi да дзикöдз омöльтчи. Гортö гижи письмö: олам бура, сэтшöма справитчи, кутшöмöн армияысь локтiс Пытш Миколай. А Миколайöс ранитчöмöн вайлiсны гортас, Помöсдiнсянь Вöльдiнöдз кайигöн кувсис. Лыыс да кучикыс сöмын вöлi кольöма. Ciйöн и письмöад пасйи. И тайö письмöсьыд меным муртса трибунал эз ло. Замполит восьтöма, лыддьöма. Ачыс коми, гöгöрвоö. «Тэ гижин?» — юалö. Ме öткажитчи. Мися, абу менам письмöыс. Но замполит жмитiс менö, лои висьтасьны. Косявлiс письмöтö син водзын. Спаситiс. Водзö пö эн йöйтав, том олöмтö эн жугöд. А сэсся велӧдчим торъя учебнöй ротаын. 1944 вося апрельын шуисны: фронт вылö. Сетiсны дзик выль паськöм, гöрд рöма американскöй ботинки. Меным веськалiс 43-öд размер. Баржа кодь. Но быть босьт. Медводз нуисны Москва дорöдз. Сувтлiм. Петкöдлiсны местаяс, кытчöдз Гитлер эз во. Москвасянь 40 километр. Висьталiсны, кутшöм тышъяс тан мунiсны. А сэсся водзö вöрзим, — Белоруссияö, Латвия граница дорö. Петiм эшелонысь. Сетiсны кос паёк. А пусьыны оз позь, мед немеч тшын оз казяв. Кодсюрö пыр жö веськалiсны минаяс вылö. Недыр мысти кутiсны бомбитны: немеч миян йылысь тöдмалöма. Разi-пельö чепöсйим, асывсö виччысим. Асывнас шуисны: подöн пö сэсся мунанныд. Сутки мунiм. Öти грездö воим, сэтчöс гумлаö меститчим. Бура вердiсны. Тшöктiсны стрöитчыны. Тiян дорö пö Баграмян локтö – Первой Прибалтийскöй фронтса командующöй. И збыльысь локтic, сёрнитiс, ставнымöс ышöдiс. А сэсся миянöc разöдicны кодöс кытчö. Ме веськалi полкöвöй штаббердса автоматчикъяслöн ротаö. Аттьö таысь Ручысь Степан Холоповлы. Сiйöс медводзӧн индiсны ротаас, шуöны: босьт пö аскöдыд нӧшта öти землякöс. И Степан менö корис. Судьбаыс Игнатий Агеевичöс дорйис. «Чужлöма дöрöмӧн», — шулöны шуда йöз йылысь. А. Уляшев ас йывсьыс шуö, мый сiйö «чужлöма кык дöрöмӧн». Доймаліс медводдза тышас нин июньын Латвияын Даугавпилс дорын. Снарядлöн тор веськалiс. Но эз ёна доймав. Санбатысь водзö Уляшев эз мун. Августын ранитчис бара. Голяас да киас веськалiсны кӧрт торъяс. Бара санбат. А тышъяс мунiсны ёсьöсь. Первой Прибалтийскöй фронтлöн Суворов ордена 77-öд Гвардейскöй дивизия наступайтiс. Тышъяс пыр мунiс и 324-öд полк, кöнi служитiс коми зон Игнатий Уляшев. Надейтчис том морт, мый Берлинöдз воас. Но эз сiдз ло. Елгава дорын сылöн война помасис. Бöръя тышыс Игнатий Агеевлöн некор оз вун. — Миян взводысь 6 мортöс ыстiсны разведкаö, — казьтылö И.А. Уляшев, — тöдмавны öтилаысь, жугöдöмаöсь абу кöрт туй. Ме тшöтш веськалi. Босьтiм противотанкöвöй гранатаяс, запаснöй дискъяс да мукöдтор. И веськалiм ставным снайпер улö. Квайт мортысь витсö виис, на лыдын и Степан Холоповöс. Öтнам ловйöн коли. Кысся канаваöд. Первой кокö веськалiс снайперыд. Аддзи ыджыдкодь пу, сы сайö кысси. Ылöсалi, кысянь снайпер лыйсьö, чургöдi автомат стволöс и юрöс пу сайысь мыччи. А снайперыд чужöмö лыйис, гад. И черлыöс жугöдiс. Каска уси, ачым уси жö. «Пом», — шуа. Виöмысь эг пов, а пленö веськалöмысь полi. Орччöн ичöтик ю вöлi, и ме сэтчань кысси гырддза вылын. А снайперыд бара аддзöма, и кыкысь шковгис – öтар и мöдар кокö. Тешитчис. И век жö ме ваад уськöдчи. Сэтысь кыскöмаöсь салдатъяс. Со тадз помасис И.А. Уляшевлы война. Медводз веськалiс Двинскса госпитальö, сэсся – Казаньö. Туплясис кöкъямыс тöлысь, чужöм вылас вöчисны куим операция, нöшта унджык – кокъясас. Гортас локтiс 1945 вося июльын. «За отвагу», «За боевые заслуги» медальясöн да Гöрд Знамя орденöн. И гражданскöй олöмас сылы мойвиис. Тöдмасис зэв тöлка анькöд, Конкордия Ивановна Базовакöд (нималана учитель — А.Ш.), гöтрасис. Нёль пиöс быдтiсны гозъя. Ставныс тöлка йöз, ас семьяöн нин олöны. Куимыслöн – высшöй образование. А Игнатий Агеевич 30 сайö во уджалiс гражданскöй авиацияын, дыр веськöдлiс Помöсдiнса аэропортöн. Талун сiйö, дерт, пенсия вылын нин. Колян во 74 тырис. Сиам ветеранлы дзоньвидзалун да тыр шуд. А. ШЕБЫРЕВ. Снимок вылын: И.А. Уляшев Казаньса госпитальын, 1945 во.
Парма гор, 2002, Рака 26 лун. |
